لاہور ہائی کورٹ کے ڈویژن بنچ نے سابق وزیر داخلہ شیخ رشید احمد کو عمرہ پر جانے کی اجازت دینے والے سنگل بنچ کے حکم کو معطل کر دیا ہے۔
تفصیلات کے مطابق، شیخ رشید کو عمرے کی اجازت دینے کے فیصلے کے خلاف ایف آئی اے اور پاسپورٹ و امیگریشن حکام نے لاہور ہائی کورٹ میں درخواست دائر کی تھی۔ ڈویژن بنچ نے اس معاملے میں انٹرا کورٹ اپیل منظور کی اور شیخ رشید کو نوٹس جاری کرکے جواب طلب کیا۔
آج کی سماعت میں جسٹس رضا قریشی اور جسٹس جواد حسن پر مشتمل ڈویژن بنچ نے عمرے کی اجازت پر حکمِ امتناع جاری کر دیا۔ عدالت نے بعد ازاں سماعت کو غیر معینہ مدت کے لیے ملتوی کر دیا۔
ڈویژن بنچ کے اس فیصلے کے بعد شیخ رشید کی توہین عدالت کی درخواست کی سماعت بھی مؤثر نہیں رہی۔