پی ٹی آئی کے رہنما سلمان اکرم راجا نے کہا ہے کہ وفاقی آئینی عدالت کے بائیکاٹ کے معاملے پر پارٹی میں مشاورت کے بعد ہی کوئی حتمی فیصلہ کیا جائے گا۔
وفاقی آئینی عدالت میں الیکشن ٹریبونلز میں ریٹائرڈ ججز کی تعیناتی کے خلاف اپیل کی سماعت ہوئی، جس کے دوران صحافیوں نے سلمان اکرم راجا سے سوال کیا کہ کیا پی ٹی آئی نے عدالت کا بائیکاٹ کر دیا ہے؟ اس پر انہوں نے کہا کہ ابھی کوئی حتمی فیصلہ نہیں ہوا اور پارٹی میں مشاورت کے بعد فیصلہ کیا جائے گا۔
سلمان اکرم راجا نے مزید کہا کہ عدالت اب قائم ہو چکی ہے اور بانی پی ٹی آئی کی قید تنہائی سے متعلق درخواست بھی زیر سماعت ہے۔ پارٹی یہ فیصلہ کرے گی کہ اگر کوئی عدالت تسلیم نہ کی جائے تو اس میں پیش ہونا ہے یا نہیں۔
دوسری جانب، انہوں نے بتایا کہ وزیراعلیٰ خیبر پختونخوا سہیل آفریدی نے الیکشن کمیشن کے سامنے قانونی طور پر پیش ہو کر قانون کی پاسداری کی ہے۔ ہری پور انتخابات سے متعلق وائٹ پیپر جلد جاری کیا جائے گا تاکہ شفافیت کو یقینی بنایا جا سکے۔
سلمان اکرم راجا نے کہا کہ الیکشن کمیشن کے سامنے علی بخاری نے اعتراضات رکھے، اور ان کی استدعا ہے کہ ہر فریق کے ساتھ یکساں سلوک کیا جائے۔ وزیر اعلیٰ خیبر پختونخوا نے کسی کو دھمکی نہیں دی، اور افسران کو تنبیہ کرنا ان کا حق ہے۔ انہوں نے مزید کہا کہ پارٹی نے الیکشن کے عمل میں کسی بھی قسم کی مداخلت نہیں کی اور آئندہ وزیر اعلیٰ کو بھی ہر جگہ پیش ہونے کی ضرورت نہیں ہوگی۔