فن لینڈ نے آپریشنل اور اسٹریٹجک وجوہات کی بنیاد پر پاکستان، افغانستان اور میانمار میں اپنے سفارتخانوں کو بند کرنے کا اعلان کیا ہے۔ فن لینڈ کی وزارتِ خارجہ نے جمعہ (28 نومبر) کو بتایا کہ اسلام آباد، کابل اور یانگون میں فن لینڈ کے سفارتخانے 2026 تک بند کیے جائیں گے۔
وزارتِ خارجہ کے بیان میں کہا گیا کہ یہ فیصلہ متعلقہ ممالک کی سیاسی صورتحال میں تبدیلیوں اور فن لینڈ کے محدود تجارتی و اقتصادی تعلقات کو مدنظر رکھتے ہوئے کیا گیا ہے۔ تینوں ممالک میں سفارتخانوں کی بندش کی تیاری پہلے ہی شروع ہو چکی ہے اور یہ مشن 2026 میں مکمل طور پر بند کر دیے جائیں گے۔
بیان کے مطابق، یہ اقدام فن لینڈ کے سفارتی مشنز کے نیٹ ورک کے اسٹریٹجک جائزے کا حصہ ہے، جس میں ملک کی خارجہ و سلامتی پالیسی اور برآمدات کے فروغ کی ضروریات کو سامنے رکھا گیا ہے، تاکہ وسائل ان ممالک پر مرکوز کیے جائیں جو فن لینڈ کے لیے تزویراتی طور پر زیادہ اہم ہیں۔
فن لینڈ کی وزیرِ خارجہ ایلینا والٹونن نے کہا کہ ہم مستقبل کے چیلنجز سے نمٹنے کے لیے بیرونِ ملک اپنے مشنز کے نیٹ ورک کو منظم اور مؤثر بنائیں گے۔ انہوں نے کہا کہ ہمارا آپریشنل ماحول تیزی سے بدل رہا ہے اور یہ فیصلہ فن لینڈ کو مضبوط اور زیادہ مسابقتی بنانے میں مدد دے گا، اور بیرونی تعلقات کو ہماری ترجیحات کے مطابق بہتر طریقے سے چلانے میں معاون ہوگا۔
یاد رہے کہ فن لینڈ نے 2012 میں مالی وجوہات کی بنا پر پاکستان میں اپنا سفارتخانہ بند کر دیا تھا، تاہم 2022 میں یہ دوبارہ کھول دیا گیا تھا۔ 2023 میں سویڈن نے بھی سیکورٹی صورتحال کے باعث اسلام آباد میں اپنا سفارتخانہ غیر معینہ مدت کے لیے بند کیا تھا۔