لاہور کے قذافی اسٹیڈیم میں کھیلے گئے پاکستان سپر لیگ (پی ایس ایل) سیزن 11 کے ایلیمینیٹر ٹو میں Hyderabad Kingsmen نے پہلے بیٹنگ کرتے ہوئے Islamabad United کو جیت کے لیے 187 رنز کا ہدف دیا ہے۔

اسلام آباد یونائیٹڈ نے ٹاس جیت کر پہلے فیلڈنگ کا فیصلہ کیا، جس کے بعد حیدرآباد کنگزمین نے مقررہ اوورز میں 5 وکٹوں کے نقصان پر 186 رنز اسکور کیے۔

بیٹنگ میں عثمان خان نے شاندار کارکردگی دکھاتے ہوئے 61 رنز بنائے، جن میں 10 چوکے شامل تھے۔ اس کے علاوہ کپتان مارنس لیبوشین نے 39، صائم ایوب نے 38 اور کوشال پریرا نے 37 رنز کی اننگز کھیل کر ٹیم کے مجموعے کو مضبوط بنایا۔

بولنگ میں اسلام آباد یونائیٹڈ کی جانب سے عماد وسیم نے 2 وکٹیں حاصل کیں، جبکہ کرس گرین، رچرڈ گلیسن اور فہیم اشرف نے ایک، ایک کھلاڑی کو آؤٹ کیا۔

میچ سے قبل گفتگو کرتے ہوئے کپتان شاداب خان نے کہا کہ فیصلہ کن مقابلے میں وہی ٹیم کامیاب ہوگی جو دباؤ کو بہتر انداز میں سنبھالے گی۔ ان کے مطابق ٹیم پاور پلے میں بہتری پر توجہ دے رہی ہے اور کسی تبدیلی کے بغیر میدان میں اتری ہے۔

دوسری جانب حیدرآباد کنگزمین کے کپتان مارنس لیبوشین نے کہا کہ اگرچہ وہ بھی پہلے بولنگ کو ترجیح دیتے، لیکن ان کی ٹیم ہر صورتحال کے لیے تیار ہے۔ ان کے مطابق پچ بیٹنگ کے لیے سازگار ہے اور ٹیم بھرپور اعتماد کے ساتھ میدان میں ہے۔

یہ میچ اسلام آباد یونائیٹڈ کے لیے “مرو یا مارو” کی حیثیت رکھتا ہے، جبکہ حیدرآباد کنگزمین حالیہ کامیابی کے بعد فائنل میں جگہ بنانے کے لیے پُرامید ہے۔