اسلام آباد میں منعقدہ ‘‘Breathe Pakistan International Climate Change Conference’’ سے خطاب کرتے ہوئے وفاقی وزیر برائے ماحولیاتی تبدیلی ڈاکٹر مصدق ملک نے کہا کہ دنیا کے صرف چند ممالک عالمی کاربن اخراج کے بڑے ذمہ دار ہیں۔ 

مگر اس کے اثرات ترقی پذیر ممالک، خصوصاً Pakistan جیسے ممالک کو بھگتنا پڑ رہے ہیں، جو ایک واضح عالمی ناانصافی ہے۔

انہوں نے بتایا کہ پاکستان کا عالمی کاربن اخراج میں حصہ ایک فیصد سے بھی کم ہے، لیکن اس کے باوجود ملک موسمیاتی تبدیلی کے شدید اثرات کا شکار ہے۔

حالیہ برسوں میں آنے والے بڑے سیلابوں کے باعث کروڑوں افراد متاثر اور بے گھر ہوئے، جبکہ معیشت کو بھی بھاری نقصان اٹھانا پڑا۔

سینیٹر شیری رحمان نے کہا کہ موسمیاتی تبدیلی اب مستقبل نہیں بلکہ موجودہ حقیقت ہے، اور پاکستان میں درجہ حرارت بعض علاقوں میں 50 ڈگری سینٹی گریڈ تک پہنچ رہا ہے۔

انہوں نے خبردار کیا کہ جنگوں کے ماحولیاتی اثرات سرحدوں تک محدود نہیں رہتے، جبکہ فضائی اور سرحد پار آلودگی بھی ایک بڑا مسئلہ بن چکی ہے۔

وفاقی وزیر آبی وسائل معین وٹو نے گلیشیئرز کے تیزی سے پگھلنے اور پانی کی غیر یقینی صورتحال پر تشویش ظاہر کرتے ہوئے بہتر انفراسٹرکچر اور ذمہ دارانہ پانی کے استعمال پر زور دیا۔

ڈپٹی اسپیکر قومی اسمبلی غلام مصطفیٰ شاہ نے کہا کہ پارلیمنٹ موسمیاتی چیلنجز سے نمٹنے کے لیے قانون سازی کر رہی ہے، جبکہ وزیر قانون اعظم نذیر تارڑ نے کلائمیٹ ایمرجنسی جیسے اقدامات کو ناگزیر قرار دیا۔

مزید پڑھیں:پیغام اسلام کانفرنس وزیر اعظم و فیلڈ مارشل کو قائدین امن قرار دیتی ہے، اعلامیہ

ماہرین نے اس موقع پر زور دیا کہ پاکستان کو تیزی سے گرین اکانومی کی طرف بڑھنا ہوگا تاکہ موسمیاتی خطرات کا مؤثر مقابلہ کیا جا سکے۔