پاکستانی شوبز انڈسٹری کی معروف اداکارہ اور ٹی وی میزبان وینا ملک(Veena Malik) ایک بار پھر خبروں کی زینت بن گئی ہیں تاہم اس مرتبہ ان کی شہرت کی وجہ کوئی نیا ڈرامہ یا فلم نہیں بلکہ ان کی شخصیت میں آنے والی نمایاں تبدیلی ہے جس پر سوشل میڈیا صارفین مختلف تبصرے کر رہے ہیں۔

حال ہی میں وینا ملک نے نجی ٹی وی چینل کے ساتھ بطور میزبان اپنے نئے پروگرام ’وینا ہے نا‘ کا آغاز کیا ہے۔ وہ اس پروگرام میں مختلف شعبوں سے تعلق رکھنے والے ماہرین کو مدعو کرتی ہیں جہاں صحت، تعلیم، طلبہ کی کامیابیوں اور معاشرتی مسائل سمیت اہم موضوعات پر گفتگو کی جاتی ہے۔

پروگرام سے سامنے آنے والی وینا ملک کی حالیہ تصاویر اور ویڈیوز میں ان کے بدلے ہوئے حلیے نے سوشل میڈیا صارفین کی توجہ حاصل کر لی ہے۔ بعض صارفین ان کے چہرے اور مجموعی ظاہری انداز میں تبدیلی پر حیرت کا اظہار کر رہے ہیں جبکہ ان کے نئے لُکس کو لے کر مختلف تبصرے بھی کیے جا رہے ہیں۔

سوشل میڈیا پر ایک صارف نے وینا ملک کا موازنہ زبیدہ آپا سے کرتے ہوئے لکھا ’وینا تو زبیدہ آپا جیسی لگ رہی ہیں‘ ایک اور صارف نے انہیں جم جوائن کرنے کا مشورہ دیا جبکہ کسی نے سوال کیا ’انہیں کیا ہو گیا ہے؟ یہ پہلے سے کافی مختلف دکھائی دے رہی ہیں‘ ایک اور صارف نے تبصرہ کیا کہ وینا ملک بھی اب عمر رسیدہ دکھائی دینے لگی ہیں۔

مزیدپڑھیں:سعودیہ: جمعہ سے منگل تک مختلف علاقوں میں تیز بارش کی پیش گوئی

تاہم سوشل میڈیا پر ہونے والی تنقید کے باوجود وینا ملک کے مداح ان کی حمایت میں بھی سامنے آئے ہیں اور اپنے پسندیدہ میزبان کے لیے محبت اور نیک خواہشات کا اظہار کر رہے ہیں۔

واضح رہے کہ وینا ملک نے اپنے فنی کیریئر کے دوران اداکاری، کامیڈی، طنزیہ پروگراموں اور میزبانی کے شعبوں میں اپنی صلاحیتوں کا لوہا منوایا۔ ان کے نمایاں منصوبوں میں سٹ کام ’مس فٹ‘، طنزیہ پروگرام ’ہم سب امید سے ہیں‘ اور فلمیں ’محبتاں سچیاں‘، ’تیرے پیار میں‘ اور ’سلاخیں‘ شامل ہیں۔ اس کے علاوہ بھارتی ریئلٹی شو ’بگ باس‘ میں شرکت نے بھی انہیں خاصی شہرت دلائی۔