سینئر اداکارہ بشریٰ انصاری(Bushra Ansari) نے اپنی بڑی بیٹی نریمان انصاری کے سابق سسرال کے رویے پر شدید غصے اور افسوس کا اظہار کیا ہے۔ اداکارہ کا کہنا ہے کہ ان کی بیٹی نے اپنے سسرال والوں کی خوب خدمت اور عزت کی لیکن علیحدگی کے بعد سابق سسرال نے نہ صرف نریمان بلکہ اپنے پوتے پوتیوں تک کو نہیں پوچھا جو انتہائی دکھ کی بات ہے۔

بشریٰ انصاری حالیہ وی لاگز میں اپنی بیٹیوں کی زندگی اور ماضی کے فیصلوں کے حوالے سے بات کرتی دکھائی دے رہی ہیں۔ ایک تازہ وی لاگ میں انہوں نے نریمان کے سابق سسرال کے رویے پر برہم ہوتے ہوئے کہا کہ انہیں ان لوگوں سے ایسی بے رخی کی توقع نہیں تھی۔

بشریٰ انصاری نے کہا کہ لڑکیاں شادی کے بعد سسرال کو اپنا گھر سمجھتی ہیں اور ان رشتوں کو نبھانے کی پوری کوشش کرتی ہیں۔ انہوں نے اپنی مثال دیتے ہوئے بتایا کہ انہوں نے بھی اپنے سسرال کی خدمت کی اور اپنے رشتوں کو اہمیت دی۔

اداکارہ کے مطابق نریمان نے بھی اپنے سسرال والوں، خصوصاً ساس اور نندوں کا خیال رکھا، ان کی خدمت کی اور انہیں عزت دی۔ وہ انہیں کینیڈا بھی لے کر گئیں اور ان کی دیکھ بھال میں کوئی کسر نہیں چھوڑی۔

تاہم بشریٰ انصاری کا کہنا تھا کہ بیٹی کی علیحدگی کے بعد اس کے سابق سسرال والوں نے کبھی یہ جاننے کی کوشش نہیں کی کہ نریمان کس حال میں ہے اور ان کے بچے کیسے زندگی گزار رہے ہیں۔ انہیں ان سے اس کم ظرفی کی توقع نہیں تھی۔

ان کا سوال تھا کہ اگر والدین کے درمیان اختلافات ہوگئے تھے تو اس کا اثر بچوں کے ساتھ تعلقات پر کیوں پڑنا چاہیے؟

بشریٰ انصاری نے سابق سسرال والوں سے مخاطب ہوتے ہوئے کہا کہ وہ سمجھ سکتی ہیں کہ میاں بیوی کے درمیان مسائل پیدا ہوئے ہوں گے، لیکن بچوں کے ساتھ محبت اور شفقت کا مظاہرہ کرنے میں کیا رکاوٹ تھی؟

مزیدپڑھیں:ایبٹ آباد: بس ڈمپر سے ٹکرا گئی، 6 افراد جاں بحق

ان کا کہنا تھا کہ بیٹے نے اپنے والدین کو جو کچھ بھی بتایا ہو، انہیں کم از کم اپنے پوتے پوتیوں کے بارے میں تو ضرور سوچنا چاہیے تھا۔

بشریٰ انصاری نے اپنے وی لاگ میں بیٹی نریمان کی بطور اکیلی ماں زندگی کی مشکلات کا بھی ذکر کیا۔ انہوں نے اس حوالے سے اپنے دکھ اور غصے کا اظہار کیا اور کہا کہ وہ ماضی میں اپنی بیٹیوں کے لیے کیے گئے بعض فیصلوں پر افسوس کرتی ہیں۔

واضح رہے کہ بشریٰ انصاری کی دو بیٹیاں نریمان انصاری اور میرا انصاری ہیں۔ دونوں کی ازدواجی زندگی میں علیحدگی کے مراحل آئے ہیں۔ میرا انصاری کی سابق شوہر امان احمد سے علیحدگی ہوچکی ہے، جنہوں نے بعد میں اداکارہ مریم نفیس سے شادی کرلی۔