بالی ووڈ کے سینئر اداکار گووندا اور اداکارہ کومل رانی کی نئی رومانوی تصاویر سوشل میڈیا پر تیزی سے وائرل ہو رہی ہیں، جن پر مداحوں کی جانب سے ملے جلے ردعمل کا اظہار کیا جا رہا ہے۔
خبر رساں ادارے کے مطابق سوشل میڈیا کے مختلف پلیٹ فارمز پر گردش کرنے والی ان تصاویر میں کومل رانی جامنی رنگ کی دیدہ زیب ساڑھی جبکہ گووندا کوٹ پینٹ میں ملبوس رومانٹک انداز میں ایک ساتھ دکھائی دے رہے ہیں۔ ان تصاویر کے سامنے آتے ہی انٹرنیٹ صارفین کی جانب سے دلچسپ تبصروں کا سلسلہ شروع ہو گیا؛ ایک صارف نے طنزیہ تبصرہ کرتے ہوئے لکھا کہ اگر کسی مرد کے پاس پیسہ ہو تو اسے کسی بھی عمر میں محبت ہو سکتی ہے، جبکہ متعدد مداحوں نے سرخ دل کے ایموجیز بھیج کر اس جوڑی کے لیے اپنی پسندیدگی کا اظہار بھی کیا۔
خبر رساں ادارے کے مطابق گووندا اور ان کی اہلیہ سنیتا آہوجا کے درمیان علیحدگی اور طلاق کی افواہیں بھی اس وقت زور پکڑ گئی تھیں جب اداکار کی کومل رانی کے ساتھ بڑھتی ہوئی دوستی کی خبریں منظرِ عام پر آئیں۔ اس کے علاوہ حال ہی میں گووندا اپنی نئی فلم ’روپا‘ کی کامیابی کے لیے دعا کرنے ممبئی کے معروف مندر لالباغچہ راجا بھی کومل رانی کے ہمراہ پہنچے تھے۔ اس حوالے سے گووندا کا کہنا تھا کہ وہ ماضی میں بھی کرشمہ کپور اور روینہ ٹنڈن جیسی ساتھی اداکاراؤں کے ساتھ فلموں کی کامیابی کے لیے مندر جاتے رہے ہیں، اور اب طویل عرصے بعد فلمی دنیا میں واپسی کے باعث وہ اسی روایت کے تحت دعا کرنے گئے تھے۔
نئی فلم اور ذاتی زندگی کے حوالے سے ہونے والی چہ مگوئیوں پر ردعمل دیتے ہوئے گووندا نے کہا کہ ابھی تو فلم کا کام شروع ہی ہوا ہے لیکن اس پر پہلے سے ہی غیر ضروری بحث کی جا رہی ہے۔ انہوں نے شکوہ کیا کہ انہیں سمجھ نہیں آتا کہ اگر وہ دوبارہ خبروں میں آ رہے ہیں تو اس پر کسی کو کیا اعتراض ہو سکتا ہے۔ اداکار نے واضح دعویٰ کیا کہ ان کے خلاف ایک باقاعدہ منصوبہ بند پروپیگنڈا کیا جا رہا ہے، جس کا اصل مقصد انہیں اپنے خاندان سے دور کرنا اور معاشرے میں ان کی ساکھ کو نقصان پہنچانا ہے۔
