سرگودھا:سابق وزیراعظم اور چیئرمین پی ٹی آئی عمران خان نے کہا ہے کہ وہ سیاست نہیں ملک کیلئے حقیقی آزادی کا جہاد کررہے ہیں۔
تفصیلات کے مطابق سرگودھا یونیورسٹی میں طالب علموں سے خطاب کرتے ہوئے پاکستان تحریک نصاف کے چیئرمین عمران خان نے کہا کہ وہ چند روزمیں لانگ مارچ کا اعلان کرنے والے ہیں۔
عمران خان نے کہا کہ آخری گیند تک مقابلہ کرنے والا چیمپئن ہوتا ہے اور انسان تب تک نہیں ہارتا جب تک وہ ہار نہ مان لے لیکن آپ کا کپتان مقابلہ کرے گا اور آپ سب نے میری ٹیم بننا ہے۔
انہوں نے کہا کہ ایک طرف قوم اور دوسری طرف چور کھڑے ہیں اور جب بھی الیکشن ہوتا ہے تو چور ہار جاتے ہیں۔
انہوں نے مزید کہا کہ اربوں کی چوری کرنے والا ڈاکو وزیراعظم بن گیا ہے جبکہ کابینہ میں 60 فیصد ارکان چوری کے کیسز میں ضمانت پر ہیں اور یہ چور ہر جگہ پیسے مانگتے پھر رہے ہیں۔
سابق وزیراعظم نے کہا کہ نیب آصف زرداری کے کیسز ختم کررہا ہے جبکہ آصف زرداری کی چوری پر کتابیں لکھی گئی ہیں، منی لانڈرنگ کرنے والے کو وزیر خزانہ بنادیا ہے جبکہ اسحاق ڈار کو وزیر خزانہ بنانا بلے کو دودھ کی رکھوالی کے برابر ہے۔
ان کا کہنا تھا کہ سنگاپور میں ایماندار لیڈر ہونے کی وجہ سے خوشحالی آئی لیکن جب وزیراعظم پیسے مانگتا ہے تو قومی غیرت ختم ہوجاتی ہے، پورے ملک کی عزت خراب ہوجاتی ہے اور شہباز شریف نے امریکہ میں کہا مجبور ہوں پیسےدے دو۔
انہوں نے بتایا کہ ہم ملک کو تباہ ہوتا دیکھ رہے ہیں کیونکہ چوروں کاٹولہ اقتدار میں آکر بیٹھ گیا ہے اور جیلوں میں سارے چھوٹے چور نظر آرہے ہیں اور جب سے یہ چوروں کا ٹولہ آیا ہے میرا نام سنتے ہی ان کی کانپیں ٹانگ چاہتی ہے، میں یہاں آیا ہوں تو ملک کی بہتری کی بات کرنے آیا ہوں۔
انہوں نے کہا کہ کچھ سیاستدان عوام کا نام لے کر اقتدار میں آتے ہیں اور اقتدار میں آکرعوام کو لوٹنے والوں کو حقارت کی نظر سے دیکھا جاتا ہے۔
انہوں نے کہا کہ قائداعظم نے اپنے لیے نہیں ہمارے لیے سیاست کی اور آج یہ ملک ایک فیصلہ کن موڑ پر کھڑا ہوا ہے، ظلم کے سامنے خاموش رہنے سے معاشرہ تباہ ہوجاتا ہے۔